Аvtomobil yo‘llari qo‘mitasida Saudiya Аrabistonida 1991-yildan buyon faoliyat ko‘rsatayotgan, 250 dan ortiq yirik loyihalarni amalga oshirgan, 10 mingdan ortiq ishchisi bo‘lgan “AL BAWANI” yirik qurilish kompaniyasi hamda “SAJCO” kompaniyasi rahbarlaridan iborat delegatsiya aʼzolari bilan uchrashuv bo‘lib o‘tdi.

Mehmonlarni Qo‘mita raisining o‘rinbosarlari Shuhrat Nazarov va Obid Odilovlar qabul qilishdi.

Uchrashuv avvalida O‘zbekiston bilan hamkorlik qilish istagida bo‘lgan xorijiy kompaniya vakillari o‘z faoliyat yo‘nalishi haqidagi maʼlumotlarni taqdim etdi.

Shuni aytish o‘rinliki, yo‘l qurilishi sohasida faoliyat olib boruvchi har ikkala kompaniya moliya, yo‘l qurilishini loyihalashtirish, asbob-uskunalar ishlab chiqarish, suv to‘g‘onlari, kasalxona va aeroport qurilishi kabi yana bir qancha yo‘nalishlar bo‘yicha yirik Xalqaro loyihalarni amalga oshirib kelishmoqda.

Аvtomobil yo‘llari qo‘mitasiga tashrifning asosiy maqsadi “Toshkent—Termiz” yo‘nalishidagi M39 avtomobil yo‘lining umumiy uzunligi 38 km bo‘lgan “Sirdaryo—Baxt” aylanma yo‘lini qurish bo‘yicha muzokaralar olib borish bo‘lib, har ikki tomon ushbu loyihani amalga oshirish bo‘yicha o‘z taklif va fikrlarini o‘rtaga tashladilar.

Ushbu loyihani amalga oshirish uchun mahalliy infratuzilmani o‘rganish nihoyatda muhim. Shu bois xorijiy hamkorlarga Sirdaryo viloyatiga borib, quriladigan obyekt bilan tanishish taklifi ilgari surildi. Yo‘lning necha tasmali bo‘lishi hamda tezlik miqdorini belgilashda bu muhim omil. Hamkorlar Sirdaryo viloyatiga jo‘nab ketishdi.